海南島之旅海南島之旅
| 飲飲食食篇 | 海灘篇 | 熱帶雨林篇 | 長途車篇 | 邪留丸棋篇 |
其實話俾人聽去海南島真係有d慚愧，因為都未乜食過當地既特色美食，果隻文昌
雞都係人地話返俾我聽至知食過，味道同$20一碟白切雞冇乜分別咋！除左冇乜好
野食之外，我仲衰相到啃魚骨，因為條死魚係河魚，好鬼多骨，搞到我當眾表演
tune大舊飯絕技，真係tune到嘔，該煨！
但我最欣賞既都係海南島既椰子汁，好似椰青溝奶，香濃得黎好清甜，只係賣3大
蚊咋！飲到嘔都得，但又衰相到俾人整瀉我個杯，不過好彩唔係瀉落我個身度，俾
隔離個男同學啃左，後尾佢仲無里頭咁做左我老豆，查實佢個樣做得我細佬有餘！
另外，o係五指山山腳渡假村野外打邊爐都幾正，班會員o係我面前食牛肉燒烤食到
咀淫淫，見到海南島野牛辛勞工作後仲要俾人屠宰，真係想同佢地即場超渡，到食
火鍋果陣竟然落雨，唯有成班走晒去有瓦遮頭既地方繼續食。其實成程飯都有好多
昆蟲飛黎飛去，我地食到咁滋味，可能同果d葬身火鍋既蟲蟲有關，而且，成班會
員見到某某個碗、杯有昆蟲死屍o係度都唔會出聲繼續食，所以我地除左食火鍋，
仲有食昆蟲宴。
班教授懶係話臨走前食返餐勁既，於是走左去食海鮮，但我覺得自己去鯉魚門食仲
正。只不過有盅椰子燉雞確實幾好味，話值四廿幾蚊喎，我地個個飲到好似o係丹
爐煉丹咁，成頭大汗，我頂唔順飲左大半就放棄，但低調會員話盅野咁貴，幾大都
要飲晒佢，仲起勢過做hon pro既拼博精神，令我好佩服佢節儉與物盡其用既美德。
跟住d變態教授食飽飯冇事做開始玩敬酒，佢地瘋狂同癲癇既表現，好似我地集體
結婚咁開心。同桌果三個男同學做左箭靶，差不多係教授"禁"住用漏斗灌佢地飲咁
滯！真係一個出$一個出命。結果一個攬任棵樹嘔，一個語無倫次(佢經常性)，一個
梗係成日同人敬酒，飲極都唔醉既，無論如果，多謝佢地啦！
去到海南島，冇去過海灘，不如立即搭飛機走人。我地先後去過亞龍灣、大東灣同
天涯海角既沙灘。最鐘意係大東灣，因為哩度有好多貝殼執，而且時逢傍晚，斜陽
映照，風景迷人，行下沙灘又浪漫過人。因為我地有同學游水，"目及"仔隊隊長飯
煲同學立即擦亮眼睛，較準對焦起勢咁"目及"，不過都唔方有咩高質素(包括在場其
他游客)，我反而留意沙灘有隻狗，好活潑開朗咁同人玩沙灘波，不過我諗佢係一
隻救生狗，如果唔係點解咁鬼瘦？
亞龍灣遊簡直係慘痛既經歷，去果陣已經俾人昆左去搭的士，查實條路仲短過由九
龍塘行去樂富。時逢接近中午，太陽晒到阿媽點認都無法辨認，全部會員匿晒入太
陽傘下，成個上午就咁過去，真係無聊。
天涯海角就幾乎冇乜野好睇，得幾舊大石，寫住"天涯"同"海角"，好鬼無聊，完全
感受唔到天涯同海角果種無盡既澎湃氣勢，淨係得個境靚，一望無際既大海，藍
天、白雲、沙灘，令我覺得地球係一幅有生命既圖畫，我個心好想有天涯海角既海
一樣，無邊無涯。
天涯海角
講真對哩個熱帶雨林有d失望，但點都好過又一城既rain forest既。我以為可以見
到幾十個人都圍唔晒既大樹，同寬闊既河流，但五指山熱帶雨林只係一個植物多
d，天氣濕熱d既郊野公園，可能我要求太高呱？！不過哩個郊野公園真係行死人，
我係行山隊已經行到得返半條人命，真係難以想像隔離隊爬山隊點爬得上咁鬼高既
山頭？！我地又驚有蜞拿喎，哩隻咁既吸血蟲非常恐怖、外表滑嘟嘟、有莽蛇紋、
半隻手指公咁大，無聲無息爬上你既玉腿，一咬住就唔放口，好核突架！為免俾佢
咬，我地著晒風褸長褲，行到出晒汗都唔除，入面件衫好似放左落洗衣機咁濕！所
謂上山容易落山難，上山個陣我地已經好似爬山咁，d路唔似人行既，行到唔夠1/3
高就全體頂唔浦要落山，果陣我寧願笠住麻包袋滾落山好過囉，d路凹凸不平之餘又
濕滑，差d搞到我仆落山，好彩有棵好心樹俾我攬住咋，我真係要好好教導牛囡愛惜
樹木。因為咁艱辛既旅程，搞到我都冇乜欣賞沿途風景，真係好可惜。
落山返酒店沖涼至係戲肉，行完山我地都〝支力〞到唔記得左蜞拿哩樣野既存在，點
知我沖完涼走去飯煲同學間房social果陣，突然聽見佢果聲驚叫由廁所傳來，飯煲出黎
果陣我地全體又驚叫，原來有隻啡色物體伏左o係佢小腿上，睇到我地雞毛都起埋。立
即四出班架牚救命，我地用汽水淋佢，用罐底挫佢，卒之俾麥太珍珍用鹽拿鬼死左佢，
佢條死野仲響地拌著飯煲既鮮血係咁典作最後掙扎，飯煲雞皮此起彼落，我地用個杯
cup住隻野，臨走果陣仲好心地寫紙仔叫執房人小心小心！
去旅行難免坐長途車，雖然我地坐到生青苔，但一大班朋友坐車，點都開心d既！開頭
果陣真係悶到痺，因為剛剛行完山，會員們都訓晒覺，但我係一個生活十分有規律既
人，唔訓，因為悶唯有唱下歌，由鄧麗君既南海姑娘(應景)唱到王菲既只愛陌生人，真
係好鬼無聊。跟住我又騷擾人，人妖同學(唔係會員)唔好彩坐正我隔離，佢想訓，我就
唔俾，鬼叫佢平時鬧得我咁過癮！之後我地真係悶得慌，連d低B遊戲都殺埋，玩接字遊
戲。其間當然有好多拗撬，基本上我地既遊戲準則好唔定，全憑眾會員主觀既決定，有
次Ica 接到個〝割〞字，就講〝割禾青〞，猩猩隊長唔俾，Ica有d唔忿氣，到我接到個
〝對〞字，就講〝對對碰〞，Ica唔俾，我就話：「有〝有獎遊戲對對碰〞哩個節目」
Ica心心不忿咁講：「咁唔俾有〝有獎遊戲割禾青〞呀？」即時笑到我地抽搐，原來連
Ica自己都唔知咩叫割禾青，仲講到振振有詞咁！我地相信〝有獎遊戲割禾青〞哩個遊
戲節目咁好笑，真係可以對低肥肥個show。架車直駛到夜晚，有幸我地見到滿天既星
星，但當時冇靚仔o係我隔離同我數星星，真係唏噓，而飯煲竟然睇到到流星，但我相
信佢只不過係眼花，架車咁震，坐都坐到滿天星！跟住冒認我老豆既男同學又悶到發
慌，無情情成程車兜我塊面黎打，仲要俾佢隔離既〝耀雞〞同學乘機打我個頭，我發晒
爛查都抵抗唔到，證明一個人長期困係一個空間內會導致精神錯亂架！
整個海南島旅程既最高潮，竟然係發生o係酒店房入面！事緣大家睇完一集反斗小王子
邪留丸卡通片後，念念不忘當中邪留丸、電蟲同和真自創既棋。玩法好簡單，用一張有
咁大得咁大既白紙，上面劃上有咁多得咁多既圈圈(or任何圖形)，再o係圈圈入面寫任
何賞與罰既句子。例句一：倒立30秒；例句二：把床單由頭套落腳扮鬼跑走廊一個圈；
例句三：擺個發姣浦士影相；例句四：扮美少女戰士影相；例句五：攬住個枕頭行走廊
一個圈......諸如此類毫無人性既懲罰方法，但千其唔好寫：例句一：停九次；例句
二：食一舊椰子糕......哩d咁便宜敵人既句子，務求寫到有咁殘忍得咁殘忍，有咁賤
格得咁賤格.......最後將d圈圈連起，至可以玩架，仲有要預備埋骰仔同棋子啦！差d
唔記得提醒大家，記得寫一個圈圈係〝退回起點〞，唔係點玩得甘呀？呵呵！o係哩個
遊戲裡面，我地先至認識到咩係慘絕人寰、迫於無奈、痛不欲生，低調會員直情俾哩個
遊戲蹂躪到即刻想搭飛機走佬，但係我地就好enjoy佢既痛苦表情，尤其見到低調會員
同珍珍倒立果陣，個樣痛苦到好似俾日本仔迫供咁，笑到我辛苦到訓左響地郁唔到。而
好多會員都受到攬枕、扮鬼到走廊遊行既折磨，但時至夜深，唔知點解有咁鬼多人響走
廊度，見晒我地咁多個受罰既戇居居表情，搞到嘈亂巴閉，真係好對唔住d房友。我地
玩到咁上下，就發生怪事，o係開門出走廊既時候，竟然開唔到門，嚇到brush會員死，
以為有咩咩咩，但其實係對門神神地唧，呵呵！一直玩到3點幾，食埋杯麵訓覺，臨訓
前都同同房既芝麻街會員笑返一輪至訓得著，哩個邪留丸之夜真係我一生難忘既一晚！
