自語自言自語
2000年9月4日
真係搞笑，我既人生生理時鐘好準時，搭正9月1日，人地返學，我就返工，好似o岩o岩放完暑假咁，不過
回顧哩個暑假真係痛苦到痺，都唔可以無憂無慮咁享受埋人生最後既快樂時光，好多會員都話想返學呀！
(雖然牛皮話諗起做hon pro就想返工！)我覺得幾後悔，因為我冇好好享受讀書既時間，而且亦冇為我既
將來而努力，人就係咁，都唔識珍惜，而我仍然渾渾噩噩咁過日辰(我份工俾我咁做！)，好多野想學，好
多野想做，但又冇周詳既計劃，我又冇時間去諗點做至好.......唉，女人想嫁，都係因為有個男人俾佢磅
住，冇乜壓力，好似可以自由d行自己既路，但都係暫時性唧，婚姻其實好恐怖，雖然我恨嫁，但係.....
唉，唔講啦！盞嫁唔出！
我牛囡落左深圳，我恨不得遲左份工飛上去見佢，掛到我心都跌出黎呀~~~~牛囡~~~~~~~~~~~~~~~~~~~~~
為我地所有會員都搵到工而歡呼!!!!!!!yeah!!!!!!!!!!!!!
2000年8月25日
明月幾時有？把酒問青天......人有悲歡離合，月有陰晴圓缺......我想唱晒成首，算。我咁感觸，因為
時近中秋，有人要同我別離，唉，好多重打擊，好彩我平時癲癲地，可以繼續癲落下，當冇事發生，呵。
我真係冇事，希望挨過哩段時期之後，我可以見乜都笑一餐，雖然平時都可以，但宜家笑完之後都唔記得
自己笑過~唉，我冇事，我冇事.......
2000年8月23日
搵工搵到我想死，越黎越對自己冇信心啦！
2000年8月13日
昨天買了一本關於手塚治虫生平的書，看一些名人的書，可以領悟一下做人的道理。
我和作者一樣，都覺得治虫的名字很有趣，他的本名是治，讀了有關於昆蟲的書，知道有一種蟲叫
osamushi，而治的發音就是osamu，手塚認為很過癮，所以後來他的筆名就是治虫了。
這本書當然不只解說他名字的由來，還有記述了他的演詞，小學同學、妹妹和生死之交對他的敘述，略略
教我認識了手塚治虫。我不認為單看一本只有百多頁的書，就能理解了一個人的一生，但至少令我知道他
的一點點，憑自己的感受去揣摩這個人。
由開始看他的漫畫「怪醫秦博士」，我就覺得他是一個很感性的人，那是因為他很愛這個地球、熱愛生命
，對生命的尊嚴看得很重，而書中他一再強調，在他的作品中一向存在著這個訊息。而每次看怪醫秦一些
感人的故事，我都必定哭，其他的作品我都覺得他將生命畫得十分出色，所以我認為手塚一定是一個了不
起的人。手塚他曾經歷第二次世界大戰，由軍國少年變為反戰主義者，曾經是個地位高、薪水多的醫生，
但他認為醫治人們的心比醫治人們的身體重要，有點魯迅的哲學思想，所以他當了漫畫家。
這本書看到我流淚的地方，是說他在戰時日本被美軍空襲後逃回家，要走三十公里的路，走到肚子餓壞的
時候，走入一戶人家裡頭討飯吃，那裡有一個婆婆見他是學生，給他搓了兩個大大的三角形飯糰，在當時
糧食配給的緊張時期，好心的婆婆竟然願意給他兩大個飯糰，令手塚十分十分之感動，一邊吃一邊說謝謝
，終於讓他有力氣走回家，之後手塚回去探望婆婆，可惜那戶給火燒掉了。戰爭的殘存，令手塚慶幸自己
沒有死去，於是希望往後的人生活得更有意義。他的生死之交說，手塚不該60幾歲便因胃癌死去，只是他
對生命的熱衷、工作的熱誠，可以令他不眠不休的工作，晝出更多更多出色的漫畫，致使他提早將生命燃
燒殆盡，對我們及未來的人來說，真的很可惜，我總是覺得他和藤子不二雄都死了，也再沒有漫畫值得我
死而已的拚命追看了！
2000年8月7日
睇完戀戰沖繩，越黎越唔鍾意王菲，係因為佢同左謝霆鋒一齊，定係佢做戲，我睇到想死？佢唱果首主題
曲我又唔鍾意，同埋唔明套戲入面點解張國榮同梁家輝會爭佢？唔覺佢邊忽靚，總之，我只係鍾意聽佢唱
歌，其他，心淡。
因為哩排肥左，心情好差，同埋要打算今後人生既發展，令人沮喪！
肥胖的表現~~~牛囡的側面
2000年7月30日
禽日做面膜，用一支幾耐冇掂既面膜黎敷面，開頭覺得佢唔好用至成日唔用佢，點知發現原來我用錯左，
支野係要敷15秒，我睇錯左要敷15分鐘，好野，我d英文真係好野！
2000年7月16日
o係屋企呆到生青苔，同珍珍傾電話，無聊到抄返舊時d淫嘻會長記事簿出黎，笑到我肚痙攣。原來我地寫d
野咁鬼搞笑，總之以前o係潔心果陣我都寫，宜家相公綿都有寫返，睇返都笑死我。我希望大家記得d咩笑
野，講返俾我聽，我想寫低返！
好掛住牛囡，今日老豆話我知，睇到牛囡影相影到有三隻眼，即刻打電話俾大佬，原來北京人興哩家野，
點滴野o係額頭度唔知做咩？點知點到牛囡發脾四，喊晒口，呵呵，牛囡真係成隻蠻牛咁！
2000年7月11日
今日同猩猩隊長去睇U-571，我最驚睇打仗片，睇到人戰死沙場我就會喊，今次睇到人戰死海底，好鬼可憐
！佢用條命救晒成艇人既命，點解個導演唔俾佢alive呀？太過份啦！
睇完戲返到屋企我仲慘過戰死沙場，本來諗住早d返屋企睇卡通片，點知冇帶鎖匙，咁o岩老豆阿媽一齊去
Shopping，真係百年難得一遇既奇景，於是我就咁摸門釘，坐o係樓梯度，打電話俾相公綿同佢傾左成兩粒
鐘，傾到個電話熱到可以煎蛋！仲要俾阿媽鬧我煲電話粥晒錢，又唔諗下邊個令我戇居居咁坐o係度冇野好
做，身上又冇銀兩，唔煲粥唔通亂咁拍隔離鄰舍度門玩呀？世事就係咁，經過今次既教訓，我可能下次就
日日帶鎖匙，不過又可能次次用唔著，到我放心唔駛帶鎖匙，又又可能再次發生摸門釘事件，真係一個可
憐既少女！
2000年7月8日
冇錢駛真係好慘，踏入行乞期我先知哩個道理，所以人要工作，目的就係駛錢咁簡單架咋！
買左隻BB音樂CD俾牛囡，我就率先聽左，d音樂令人好舒服，聽到我昏昏欲睡，如果牛囡聽完仲咁精神，
我會懷疑佢有過度活躍症。哩排牛囡好誇，玩果陣笑得好大聲，人地抱起佢就興奮到擺晒姿態兼扯人頭髮
，完全超出一個4個月大BB既活動能力，我都話佢係魔鬼怪嬰啦！
我想去只有藍天白雲沙灘既地方，然後唱許茹芸既難得好天氣。
2000年7月6日
意大利輸左波，我傷心到食唔落野，又喊左幾日，瘦左幾磅呀！但傷痛過左d後，我又食返野，悶o係屋企
真係冇計。我仍然覺得好唔抵，只不過差果幾秒鐘咋嘛，個盃就係意大利架啦！最慘又係我鍾意既球員lai
野，要迪比阿路背起罪人既罪名，仲hurt到俾個球迷撕爛佢件波衫，駛唔駛咁唔俾面呀？就算有個身材惹
火又靚女既女朋友都補唔番。我唔理，我永遠視意大利係最好既球隊，永遠都咁支持佢地！
我真係冇乜心情減肥，至多遇著d超勁肥既野我就唔食囉！有預感我點減都係咁既騎呢樣架啦，都係第時有
錢我先去抽脂減，慳番d力水！
我宜家好想去意大利，仲要揀o岩天時地理人和，我心情靚靚至去。以前好鬼白痴，話要同男朋友去，家下
真係搵風同我去啦！等得有黎都70歲囉，所以我宜家要同朋友去，就算一個人去都好，如果我忽然夠薑既
話，呵呵！
